Ginhinyu it senado nga paeaparon pa ro sakop it loan program it mga government financial institution (GFIs) nga kabulig para sa public utility vehicle (PUV) modernization program.
Suno kay Public Services Committee Chair Senator Grace Poe nga klaru nga ro sangka driver nga nagakita it ₱750 pesos kada adlaw hay indi masarangan nga bayaran ro bag-ong unit it PUV nga naga-abot sa ₱2.3 million ro kantidad pinaagi sa pagbiyahe.
Ginpahayag it senadora nga masyadong kueang ro ₱160,000 nga subsidy para sa mga driver nga magahalin sa gobyerno.
Bangud kara, ginaduso ni Poe ro sangka nagakabagay ag makatawo nga PUV modernization kun sa siin indi dapat maganaba sa 20% ro subsidiya it gobyerno.
Ginpamilit pa ni Poe nga obrahon nga “15 years to pay” ro pagbayad utang it mga driver ag operators agud nga indi mabug-atan ro mga raya sa epekto it modernisasyon.
Sa makaron, ro Landbank ag Development Bank of the Philippines hay ginapasugtan ro borrower nga makautang it hasta sa 95 percent it kabilugan nga kantidad it public utility jeepney nga may 6% interest rate per annum ag payable ukon pwedeng mabayaran sa sueod eang it pitong dag-on.
