KALIBO, Aklan—Uman nga ginpadumdum ni Terrence Toriano, head it Municipal Disaster Risk Reduction Management Office ukon MDRRMO Kalibo ag miyembro it Local Inter-Agency Task Force against Covid 19 nga sa idaeum pa it Modified General Community Quarantine ukon MGCQ ro Aklan rason nga limitado pa gihapon ro hueag it mga tawo.
Suno kana nga makaron hay naobserbahan nanda nga masyado eon nga kampante ro mga tawo bangud nga nagapinagusto eon sa pagpinanaw kamana man nga maabu nga mga unga nga nakikita nga nagahampang sa guwa.
Mag-eowas kara, may mga senior citizens ag mga 21 anyos panaba nga mga pamatan-on nga nagawinarang nga makabig nga vulnerable sa nasambit nga sakit.
Ginpadumdum pa ni Toriano nga kon owa man lang it importanteng panaw hay mas mayad nga magpabilin eon lang sa sueod it baeay.
Indi kinahangean nga isugae ro kaeowasan bangud nga owa it ginapili nga tawo ro COVID-19.
Sundon ro mga minimum health standards kapareho it physical distancing, pagsuksok it face mask ag pirmeng paghugas it alima.
Samtang, nagpaandam pa si Toriano nga mabudlay nga makaangkon it community transmission bangud nga owa eon it masyadong mabahoe nga pondo ro gobyerno agud nga igastos sa mga kinahangeanon.
Samtang, tuyo sigon it ginpatuman nga granular lockdown sa Sitio Liboton B ag Ilaya sa Bakhaw Norte, Kalibo nga indi eon magkalhit pa ro virus.
Ipangamuyo sigon it tanan nga owa it may mag positibo sa mga ginboe-an it swab sample sa lugar agud nga indi eon makaangkon it panibag-ong set it contact tracing ag RT-PCR testing.
