KALIBO, Aklan—Hugut nga ginpamalibaran ag gintawag nga fake news ni Malay mayor Frolibar Bautista ro napabalita nga igapaidaeum sa lockdown ro isla it Boracay.
Raaya hay sa pihak it nailistang mga bag-ong kaso it coronavirus disease 2019 (COVID-19) sa sangka high-end hotel.
Uman nga nagpadumdum ro alkalde sa mga netizens nga magdahan sa pag-post ag pag-share it anuman nga saea nga impormasyon nga maka-apekto sa industriya it turismo eabi eon sa Boracay.
Nasayuran nga balik operasyon eon ro Shangri-La Boracay Resort & Spa sa Barangay Yapak matapos ro ginpatigayon nga maeapnagon nga paglimpyo ag disinfection agud nga matapna ro pagkalhit it COVID-19 kasunod it pag-positibo sa sakit it 16 nanda nga mga empleyado.
Angot kara, ginpahayag ni Bautista nga padayun nga gina-obliga ro tanan nga mga residente ag bisita nga magsuksok it facemasks sa sueod ag sa pampublikong lugar kamana man ro pag obserba it physical distancing.
Nauna eon nga nagpatigayon it mass testing ro Provincial Health Office, Department of Health ag MHO-Malay it mass testing sa tanan nga mga empleyado it hotel kamana man ro mga boatmen ag island-hopping workers nga gin-umpisahan ko buean it Disyembre.
Sa pihak kara, ginkalipay man ni mayor Bautista ro amat amat nga pagtaas it tourist arrivals sa isla nga naga-average makaron sa 300 hasta 400 guests per day.
Kaeabanan kara hay nagahingabot sa gina-offer it mga hotels and resorts nga haeos 50% discount ag sa mga pamasahe sa eroplano.
