Kalibo Aklan ——Ginbo-oe eon ro lockdown sa Kingdom of Saudi Arabia , apang nagapabilin sa gihapon ro curfew nga naga-umpisa alas-10 it agahon hasta alas-5 it aga-aga.
Suno kay Bombo International Correspondent Valen Teodosio, tubong Brgy. Polocate, Banga ag nagatrabaho sa Riyadh, Saudi Arabia nga kapin sa 10,000 Riyal ukon katumbas it 130,000 pesos ro ginapapanaog nga multa sa mga violators.
Maskin suno kana ro mga shops nga maga-eabag sa mga regulasyon ag instructions hay ginapasarado.
Agud nga mapatuman ro social distancing sa shop nga anang gina-obrahan hay ginapatigayon ro skeletal workforce, kun sa siin, 50 porsiyento eamang it mga workers ro ginapasugtan nga magsueod sa trabaho.
Gintaw-an sigon sanda it 21 diyas nga vacation leave with pay ag may food allowance pa.
Ginpahayag pa ni Teodosio nga kon nagaguwa it baeay agud nga magbakae kinhangean gid nga i-observe ro physical distancing, dapat nga nakasuksok it face mask ag may gloves .
Samtang, nakalista suno kana it maabu nga mga nagpositibo sa virus nga naga-abot eon makaron sa masobra sa 27,000 matapos ro ginpatigayon nga mass testing, kun sa siin, nakalista it local transmission.
Sa pihak nga parte, ginpahayag ni Teodosio nga nagbukas eon ro pila sa mga negosyo sa KSA kaibahan ro mga wholesale ag retail shops kamana man ro mga malls.
Apang nagapabilin nga sarado ro mga beauty parlors, barber shops, gyms, sinehan, ag restaurants.
Bawae man ro pagtipon-tipon it masobra sa limang katawo rason nga maskin may Ramadan hay sarado ro mga moske idtu.
Nagasunod sigon ro tanan sa laye bangud nga owa gina-exempt kara basta nga makahimo it saea.
