KALIBO, Aklan—Ginkumpirma it lokal nga gobyerno it kalibo nga ginpaeawig pa it sang domingo ro lockdown ukon “surgical enhanced community quarantine” sa Purok 1, C Laserna St., Kalibo nga makabig nga sangka critical zone.
Unang ginpadaeum sa lockdown ro nasambit nga lugar ko nobyembre 20 hasta Sisyembre 4.
Apang suno kay Executive Assistant to the Mayor Mr. Basil Tabernilla nga nagpaguwa si Kalibo mayor Emerson Lachica it Executive Order 085-series of 2020 nga extended ro lockdown sa lugar hasta sa Disyembre 11.
Raya hay matapos magpositibo sa Coronavirus Disease ro 22 halin sa unang batch it mga residente nga ginpaidaeum sa swab test ag nadugangan pa it 18 nga panibag-ong nagpositibo sa ikaywang batch it ginpaguwa nga resulta.
Ginkinahangean sigon nga pahabaan ro lockdown agud nga masigurong indi eon magakalhit pa ro sakit.
Nagapabilin sigon sa isolation facilities ro mga nagpositibo sa sakit nga mga residente ag maskin natapos eon ro andang 14 days nga quarantine period hay indi man sanda maka-uli bangud nga gin-extend ro lockdown sa andang lugar.
Samtang, padayun man sigon ro pagtau it ayuda sa mga apektadong residente.
Hasta ko Disyembre 2, ro aktibong kaso it sakit sa banwa it kalibo hay naga-abot eon sa 67.
