KALIBO, Aklan—Amat-amat eon nga nagabukas ro mga establisyemento ag negosyo sa Espanya.
Raya hay kasunod it manami nga resulta it ginpatuman nga lockdown it gobyero kontra sa Coronavirus Disease ukon COVID-19 pandemic.
Suno kay Bombo International Correspondent Roland Decena it Barcelona, Spain nga extended pa hasta it Hunyo 21 ro lockdown sa nasambitang nasyon.
Ginpahayag dugang ni Decena nga hasta 15 katawo eang ro ginapsugtan nga pwedeng mag-iba sa sueod it sangka edipisyo kapareho it restaurant.
Maskin nga may paghaeuga eon sa pilang polisya hugut pa gihapon nga ginamandu idto ro pagsuksok it facemask ag pag-obserba it social distancing.
Ro mga madakpan nga maga-eabag kara hay magapangatubang it multa nga 100 euros ukon katumbas it masobra 5,000 pesos.
Angot kara, nakataeana eon man nga pagabuksan ro mga border it nasyon antes mag-abot ro unang adlaw it buean it Hulyo kung sa siin magabukas eon raya sa pagbaton it mga turista ag bisita.
Ro Espanya hay nakalista it kabilugan nga 288, 390 COVID-19 cases kung siin may una rayang total deaths nga 27, 135.
