KALIBO, Aklan—Matapos ro daywa domingo nga lockdown, indi pa gihapon makaguwa it baeay ro mga naga-istar sa Purok 1 C. Laserna St. Kalibo.
Disyembre 4 kunta ro nakataeana nga pagaboe-on ro lockdown sa nasambit nga lugar nga nag-umpisa ko Nobyembre 20.
Apang suno kay Punong barangay Neil Candelario it Brgy. Poblacion, Kalibo nga gindesisyunan it local inter-agency task force it Kalibo nga paeawigon pa ro lockdown hasta sa Disyembre 11 bangud sa pag-angkon it 18 nga bag-ong positibong kaso it COVID-19 kat magpatigayon it intensified community testing.
Bangud kara, padayun ro ginapatuman nga stay-at-home policy sa mga residente sa lugar.
Gindugang pa ni kapitan Candelario nga padayun ro bulig it provincial government ag LGU Kalibo sa pagtau it pagkaon sa mga apektadong residente.
Kamana man ro iba pang kinahangeanon kapareho it gatas ag diaper sa mga eapsag.
Ginakabig eon makaron nga epicenter it sakit ro Kalibo bangud sa haeos 22 nga kaso it COVID-19 idtu sa unang swab testing ko nagtaliwan nga domingo ag nasundan pa it 18 sa bag-ong ginpaguwa nga resulta.
Sa makaron ro aklan hay may kabilugan nga 332 nga kaso it covid 19.
