KALIBO, Aklan – – – Makabig nga “declaration of intention” pa eamang ro naging pahayag ni Pangueong Rodrigo Duterte nga ipaidaeum ro isla it Boracay sa “state of emergency”.
Suno kay Aklan Vice Governor Reynaldo Quimpo nga hueaton eon lang sigon engkaso nga ideklara gid man raya it presidente.
Paga sayuron sigon nanda kun ano ro magiging implikasyon kara kamana man kun ano ro plano it national government.
Gin pahayag dugang ni Quimpo nga health, safety and security ro mga gina panan-aw ni Duterte para sa nasambitan nga deklarasyon.
Samtang, nagapati man ro bise gobernador nga mayad ro intensiyon it pagdeklara it “state of calamity” bangud pinaagi kara matutukan ag masolusyonan ro environmental problems sa isla.
Kumpiyansa man imaw nga maayos ro gina pangatubang nga problema it Boracay sa sueod it an-um nga buean nga mandu it presidente.
Posibli man suno kana nga engkasong owa it improvement sa gintaeanang “timeline”, dikara eon ro posibilidad nga isarado ro isla.
Gin pasiguro ni Quimpo ro kooeperasyon it provincial government sa national government sa mga gina patuman nga programa sa pagsalbar ag rehabilitasyon it isla.
Naga eaum man imaw nga maga bulig ro gobyerno para sa pagpondo sa pagkay-ad sa problema sa isla nga gina eakipan it sewerage, solid waste ag drainage system.
Gin pasiguro man kara nga paga pasabton ro mga nakaangkon it bayolasyon sa environmental laws.
