KALIBO, Aklan — Bangud sa isyu it African Swine Fever (ASF) nga nakakaapekto sa pilang nasyon ag mga probinsiya sa Luzon, temporaryong ginbawae sa sueod it 90 diyas ro lokal nga gobyerno it Aklan ro pagpasueod kara it buhi nga baboy ag anumang produkto halin kara.
Maskin nga owa pa man it kaso it ASF sa Aklan, ginpahayag ni Animal Quarantine head Dr. Joseph Lachica it Office of the Provincial Veterinary nga tuyo it ginpaguwa nga Executive Order 46 ni Aklan Governor Florencio Miraflores nga naging epektibo ko Setyembre 27 nga maprotektahan ro swine industry ag mapabilin nga eowas sa ASF ro lugar.
Ginabantayan man sigon nanda makaron ro mga pantalan ag paeuparan agud nga owa it makasueod nga karne it baboy.
Mag-eowas kara, nagapatigayon man it random inspections sa mga checkpoints ag quarantine sites.
Gin-abisuhan man ro mga naga-alaga it baboy nga indi anay pakaunon ro mga alaga it damog nga ginakolekta halin sa mga hotels, resorts, restaurant ag iba pa.
Ginapahueag man kara sa mga alkalde ag opisyal it barangay ro andang natungdan nga bantay-dagat sa bulig it Philippine Coast Guard agud nga madakpan ro mga nagapuslit it buhi nga baboy, karne ag iba pang pork products.
