Ginduea it lokal nga gobyerno it Malay ro kabaeaka it mga pumueoyo ag mga turista sa ginatos ka mga sinkholes nga naidentified sa isla it Boracay.
Suno kay Punong Brgy. Nixon Sualog it Brgy. Manocmanoc, Boracay nga ko 2018 sa kasagsagan it pagpasarado sa isla ni dating Pangueong Rodrigo Duterte hay nagpatigayon it survey ag hazzard mapping ro Mines and Geosciences Bureau (MGB) it Department of Environment and Natural Resources (DENR) kaibahan ro LGU Malay ag barangay officials kon siin 789 sinkholes.
Ginpadayon ro nasambit nga aktibidad ko 2019 kon sa siin nadugangan raya nga umabot it 801 sinkholes eon ro andang nataeopangdan hasta naging 814 sinkholes ko 2020 ag ko Disyembre 12 nga report it MGB it DENR hay umabot eon raya sa 815.
Ginpahayag dugang ni Sualog nga ro nasambit nga mag sinkholes hay konektado sa identified wetland sa isla ag may mga marking sigon kara nga ginbutang ro ahensya nga nagapamatuod nga bawae nga tindugan it maskin anong edipisyo ro may red marker samtang sangka grado hasta daywang gradong edipisyo eamang ro pwede nga mapatindog sa may yellow marker.
Ro survey suno kana it ahensya hay anda raya nga ginatuman kon sa siin sa kamatuoran hay may kopya sanda sa mga lugar nga identified nga may sinkholes para sayod sanda kon nagakadapat nga taw-an it permiso ukon inde ro may gusto nga magpatindog it mga edipisyo sa isla it Boracay
