KALIBO, Aklan—Temporaryong ginsuspinde it lokal nga gobyerno it New Washington ro pagpangisda sa kasubaan sa bisinidad it shipyard sa Brgy. Polo, District 1, 2 ag 3 sa Brgy. Pinamuk-an; Sitio Malogo, Kamingawan, Lagatik riverside sa Brgy. Poblacion ag Sition Kamanggahan sa Brgy. Tambak sa nasambit nga banwa.
Ro ginpaguwa nga executive order ni New Washington Mayor Jessica Panambo hay kasunod it nag-eontad nga oil spill maghalin sa nagleak nga lube oil sa ginabreak nga power barge sa yard it Metallica Shipbuilding/Breaking Company nga ginapanag-iyahan ni Mr. Jonathan Salvador.
Ro nasambit nga tikang it lokal nga gobyerno hay agud nga maprotektahan ro ikaayong eawas it mga pumueoyo sa kontaminasyon nga resulta it oil spill.
Nauna eon nga nagpatigayon it clean-up operation ro Philippine Coast Guard Station Aklan; Marine Environmental Protection Command (MEPCOM) it Philippine Coastguard ag iba pang Local Response Teams ag volunteers pinaagi sa pagbutang it Spill Boom, Manual Scooping & Matting with Marine Oil Absorbent Mats and Pads agud nga inde eon magkalhit ro langis sa iba pang coastal waters sa nasambit nga lugar.
Madumduman nga pilang ka fish cage sa lugar ro naapektuhan kon sa siin nakit-an ro mga isda nga nagkaeamatay bangud sa epekto it langis.
