POLICE Report — May nina sa ueo ag owa eon it kabuhi kat masapwan ro bangkay it 70-anyos nga lola nga owa it eambong sa bilog nga eawas sa sangka sementeryo sa Almendras, Sorsogon.
Nakilaea ro biktima nga si Alameda Dichoso, ag residente it Balogo, East District, Sorsogon City.
Presenteng ginapaidaeum sa eksaminasyon ro bangkay it biktima agud nga matumod kon gin-rape anay ro biktima antes nga ginpatay bangud sa hubeas raya kat makit-an sa sangka nitso sa sementaryo.
May nakit-an man nga bato nga may mantsa it dugo sa palibot it crime scene nga ginadudahan nga gingamit sa pagpatay sa biktima.
Ginkundina man ni Almendras Brgy. Chairman Pat Dioneda ro makangieidlis nga krimen nga suno kana hay posibleng ginhimo it sangka owa it matino nga paminsaron.
Nagpanawagan man si Dioneda it bulig halin sa anang mga nasasakupan agud nga mapasabat ro suspek.
Samtang, ko Lunes, Enero 20, naaresto it pulisya ro sambilog sa mga suspek nga nag-aku sa ginhimo nga pagpang-holdap ag nagpahayag nga owa sigon nana ginaeauman nga pagahimuslan ag pagapatyon it anang kaibahan ro magueang.
Sa panaysayon it nadakpan nga suspek, alas- 5:00 it hapon samtang sanda hay naga-inuman hay nag-agi ro lola ag ginkasugtan nanda nga paga-holdapon.
Suno pa kana nga kat makitang gin-eampusan it bato it anang kaibahan ro biktima hay nagpaeagiw eon imaw ag owa nana nasayuran nga pagahimuslan pa kara ro magueang.
Padayun pa nga ginatugis it pulisya ro suspek nga pumatay ag nag-rape sa biktima.
