KALIBO, Aklan — Naboe-an it masobra sa P70,000 nga cash ag mga alahas ro sangka senior citizen sa Roxas Avenue Extension, Brgy. Andagao sa banwa it Kalibo it mga gina-alegar nga miyembro it budol-budol gang.
Ginsaysay it biktimang si alyas “Rosing” nga samtang nakatambay sa sangka mall kaibahan ro anang apo hay ginpaeapitan imaw it daywang eaeaki ag tatlong babaye ag ginasugid nga gina-usoy it mga raya ro anang unga nga si certain “Lucille”.
Nakumbinsi sigon it mga suspek ro lola nga sumakay sa andang saeakyan sa guwa it mall, kun sa siin, maskin ro anang suksok nga alahas nga ginaeakipan it sangka pares nga aritos nga gold, tatlo ka mga singsing nga gold, sangka kulintas ag P9,000 nga cash hay nabo-oe kabaylo it gintau kana nga sangka bag nga gina-alegar nga may sueod nga kwarta.
Ginpakita pa sigon it mga suspek sa biktima ro pagsueod it mga kwarta sa
bag, apang kat mag-uli imaw sa andang baeay hay natukiban nga mga nakaputos nga
bundle it pad paper, bato ag yabe ro sueod it bag.
Sa makaron hay nagapadayun ro imbestigasyon it theft and robbery section it kalibo Police Station sa nasambit nga insidente.
