KALIBO, Aklan—Sa padayon nga pag-eapnaag it mga peke nga kwarta ag mga tawo nga nagapamentaha, nag-apela ro awtoridad sa publiko nga insigidang magreport sa taeatapan it pulisya engkaso nga mabiktima it mga manugloko.
Raya hay matapos nga nabiktima it peke nga kwarta ro vegetable vendor nga nakapwesto sa Kalibo shopping center.
Suno kay P/Lt. Sally Bretania, tagapaghambae it Kalibo Municipal Police Station, kinahang-ean nga ireport eagi sa pulisya ro mga makaraya nga insidente agud nga maka-conduct sanda it nagakaigo nga imbestigasyon.
Inde sigon makasayod ro mga awtoridad kon uwa it may magdangop kanda rason nga nagapanawagn gid sanda sa publiko nga insigidang ipaabot sa andang taeatapan engkasong may matabo nga kaparehas kara nga insidente.
Madumduman nga nabiktima it peke nga P1,000 peso bill si Nanay Maria nga residente it Aliputos, Numancia kon sa siin ulihi eon nana raya nataeopangdan kat nakapanaw eon ro suspek.
Base sa istorya it tindera, bandang alas-5:00, aga-aga it Martes kat nag-umpisa imaw nga maglatag sa anang baligya nga mga tinuean-on kat may nagpaeapit kana nga sangka eaeaki ag nagbakae it tinuea sa halaga nga P150 pesos.
Bangud sa P1,000 peso bill ro kwarta it eaeaki hay gilayon nana raya nga ginsinsilyuhan it P850 pesos.
Ulihi eon ro tanan kat ana nga nataeopangdan nga peke gale ro binayad kana nga kwarta.
