KALIBO, Aklan — Mas eowas ag mas maayos eon makaron ro gina-istaran it sangka lola kaibahan ro anang daywang apo ag daywang gumankon nga puro mga maintok pa matapos nga pormal kanda nga gin-turn-over ro bag-ong baeay nga ginpa-obra ni Kalibo Mayor Juris Sucro, agahon it Miyerkules, Nobyembre 12.
Suno kay lola Leonila Ramos, 63 anyos ag residente it Sitio Ilang-Ilang, Brgy. Andagao, Kalibo nga mabahoe ro anang pagpasaeamat sa baeay nga gintau kanda it alkalde.
Mag-eowas sa baeay, nagtau man si Barangay Affairs head Mark Sy it linya it tubi, telebisyon ag iba pang importanteng gamit sa sueod it baeay.
Nasayuran nga natabing ro tagipusuon ni Mayor Sucro matapos nga makita ro kahimtangan it lola nga gin-post sa social media it sangka netizen nga tumandok man sa nasambit nga lugar.
Ro lola hay dating naga-istar sa barong-barong nga owa it dingding ag gin-atupan eamang it sangka yero nga makabig nga bukon it eowas nga istaran.
Trabaho nana ro nagapanuway ag may kahigayunan nga naga-libod it isda.
Pinaagi sa sangka simpleng seremonya hay ginbaton ni lola Leonila ro yabe it anang bag-ong baeay nga ginsaksihan it iba pang opisyal it LGU-Kalibo.
