BALITA Espesyal–Sangka 76-anyos nga lola sa Ecuador ro nakit-an nga buhi sa anang kabaong samtang ginalamayan.
Ko Hunyo 9, gindaea sa ospital si Bella Montoya bangud sa cardiopulmonary arrest at stroke.
Kat owa nakitaan it maskin anong response ro anang eawas halin sa resuscitation efforts it mga doktor, gindeklara imaw nga patay ag gintaw-an it death certificate ro anang pamilya.
Gindaea ro bangkay ni Montoya sa sangka funeral home apang limang oras pa eamang imaw nga ginalamayan, nakabati ro anang unga it sangag nga nagahalin sa kabaong.
Suno kay Gilberto Barbera, unga ni Montoya nga nakabati sanda it panuktok halin sa kabaong.
Insigida nanda raya nga ginbuksan ag nakitang naga ginhawa pa ro andang ina.
Viral makaron sa mga social media websites ro video it pagbugtaw ni Montoya samtang sa sueod it kabaong.
Makita sa video nga ginahapo ro magueang rason nga madasig raya nga ginbo-oe halin sa kabaong it anang mga unga.
Ginbalik sa ospital si Montoya ag ginbutang sa Intensive Care Unit.
Una eon sa stable condition ro magueang apang owa pa raya nagabugtaw.
Sa makaron hay nakitaan it improvement ro anang ikamayad nga eawas ag nagapakita eon it responsiveness sa kada ginapislit it doktor ro anang alima.
Sa makaron, nagapatigayon it maeapnagon nga imbestigasyon ro Health Ministry it Ecuador kun nakaangkon baea it medical malpractice sa kaso ni Montoya.
