BALITANG Espesyal — Literal nga “saved by the bell” ro natabu sa sangka 90-anyos nga lolo sa Germany matapos nga aksidente nga na-trap sa sueod it simbahan ag na-recue pinaagi sa bulig it alingganay.
Ro eaeaki nga residente it sangka nursing home hay nag-ea-ong nga magatambong eamang sa sangka event sa simbahan ko gabi-i it Sabado, Hulyo 20.
Apang owa raya naka-uli rason nga gin-report it mga empleyado it nursing home ro missing nga lolo.
Insigidang nagpatigayon it pag-usoy ro kapulisan ag nag-deploy it an-um nga patrol cars sa palibot it simbahan ag sa pirmeng hangout spots ukon tambayan it mga nursing home residents.
Sangka police officer nga naka-duty ro na-alerto sa tunog it alingganay, bandang alas-3:15 it aga-aga rason nga ginpadaehan it patrol sa simbahan.
Nasayuran nga ro nasambit nga simbahan hay nagagamit eon it automated systems ag bukon it nakasanayan nga tawo ro nagabagting it alingganay.
Natigayon nga maistorya it mga otoridad ro lolo ag nakaguwa matapos nga ginbuksan it pastor ro simbahan.
Ginsaysay it lolo nga na-trap imaw sa simbahan matapos raya nga gin-lock.
Naglinibot sigon imaw sa sueod it simbahan hasta nga ko ulihi hay nakita nana ro device nga naga-kontrol it alingganay ag raya hay gin-activate.
