Sa sueod it 60 anyos, pirmeng ginahinoesuean ni Ted Sams it Pasadena, California ro owa pagtapos it high school.
Apang makaron nga dag-on, natuman eon ro anang handum nga makapag-martsa sa stage ag makabaton it anang diploma kaibahan ro Class of 2022 it San Gabriel High School sa Southern California.
Dag-on 1962 kat madaeahig sa gulo ro senior high school kato nga si Sams.
Bilang penalidad, nasuspinde imaw it limang adlaw antes nga magtapos ro school year.
Bangud nga owa nakabo-oe it final exams, kinahangean nana nga magtambong sa summer classes para makumpleto ro anang mga grades.
Kat ginabo-oe eon nana ro anang diploma, indi raya itau kana it school registrar bangud nga may utang pa imaw nga $4.80 dollars sa eskuwelahan.
Bangud nga mabahoe nga kantidad raya kato, ginpabay-an eon lang nana ro diploma ag owa eon ginplano nga boe-on.
Makaron nga 2022, may sangka school official it San Gabriel High School ro nakatukib it diploma ni Sams nga nakatago sa sangka lumang filing cabinet.
Naisipan nana nga gin-imbitahan si Sams nga nag-attend it graduation ceremony agud nga maexperiensiyahan nana nga magsuksok it toga, makapag-martsa ag nagbaton it diploma sa stage.
Insigidang ginbaton ni Sams ro imbitasyon bangud suno kana, pirme nana nga ginahinoesuean sa $4.80 dollars hay owa nana nabaton ro anang diploma.
Makaron hay eubus eon imaw nga high school graduate.
Suno kay Sams, ginpa-frame nana ro anang diploma ag gina-display sa anang baeay.
