Sangka 72-anyos nga lolo sa China ro gindayaw it mga Chinese netizens bangud sa determinasyon kara nga mapabueong ro apong may grabeng baeatian.
Ko 2017, na-diagnose nga may sakit nga spinal muscular atrophy ro limang dag-on nga apo ni Zhu Yunchang.
Bangud kara, kinahangean nga ibaligya it andang pamilya ro pila sa andang mga properties para mapabueong ro unga.
Apang kueang gihapon bangud nga nagabalor it 700,000 Yuan ro bueong it apo.
Kueang man ro pension nga ginabaton ni Zhu kada buean rason nga naga-usoy imaw it ibang paeangitan-an.
Natukiban nana nga mabahoe ro ginakita sa pagiging beauty and makeup vlogger rason nga naisipan nana nga raya hay testingan.
Agud nga may magamit nga makeup sa gina-umpisahan nga vlog, nagpangayo imaw it mga sample sa sangka cosmetics company apang kat masayuran it mga raya nga imaw hay sangka 72-anyos nga lolo, nagpamalibad ro mga raya nga padaehan imaw it libreng produkto.
Nagbaskog it buot nga mag agto sa sangka baealigyaan it makeup si Zhu agud nga magbakae it makeup nga pagagamiton sa anang vlog.
Idtu man imaw nagpaturo sa mga saleslady kun paalin ro tamang pamaagi it paggamit it mga raya.
Sa unang livestream ni Zhu hay insigida imaw nga nataeupangdan it mga viewers bangud sa unique nana nga content.
Kat masayuran it viewers ro rason ni Zhu sa pag-makeup, maabu ro natabing ro tagipusuon bangud nga paga obrahon nana ro tanan agud eang nga mabuligan ro anang apo.
Bangud kara, madasig nga nagtaas ro views it anang mga vlog ag nag-umpisa eon imaw nga kumita it kwarta.
Sa makaron , kaibahan eon sa medical insurance ro pila sa bueong it apo ni Zhu.
Apang maskin nga nabawasan eon ro andang gastos, ginpadayun gihapon ni Zhu ro pagiging beauty vlogger.
