KALIBO, Aklan — Plano makaron it munisipyo it Banga nga permanenteng ipasarado ro kalye sa katung-anan it Teodosio’s Cultural and Sports Complex ag simbahan agud nga mataw-an it daean ro construction it police station, fire station ag municipal motorpool.
Suno kay Banga Sangguniang Bayan member Jocel Rata, chairman it Committee on Rules and Laws nga sa maabot nga Setyembre 11 hay magapatawag sanda it public hearing agud nga maipresentar nanda ro ordinansa angot sa nasambit nga plano .
Ginpahayag dugang nga nagtaeana ro LGU-Banga it haeos P2.4 million para sa pagbakae it lote sa igapatindog nga mga istraktura, apang medyu kueang sigon ro nasambit nga pondo bangud ro nagadaeagan makaron nga presyo it eugta sa poblacion Banga hay naga-abot sa P5,000 hasta P8,000 per square meter .
Ro pagpatindog suno kana it police ag fire station hay nagakinahangean it 400 square meters nga eugta kada ahensiya.
Nasayuran nga sa makaron hay ro banwa it Kalibo ag Banga eon lang ro owa it kaugalingon nga police station.
