Ginmando ni Raphael Lotilla, bag-ong taeana nga Cabinet Officer for Regional Development and Security (CORDS) sa Western Visayas ag sekretaryo it Department of Environment and Natural Resources (DENR), ro maid-id nga beripikasyon it tanan nga natapos nga flood control ag iba pang proyektong pang-imprastraktura sa Region 6.
Sa anang unang opisyal nga pagbisita ko Pebrero 12, ginmanduan nana ro Department of Public Works and Highways (DPWH) nga siguraduhon ro striktong pagsunod sa pambansang basehan sa national engineering ag pangkalikasan agud masiguro nga masarangan it mga proyekto ro mas mabaskog nga bagyo ag paeag it climate change.
Suno pa kay Lotilla, kaakibat raya it adyenda ni Pangueong Ferdinand Marcos Jr. para sa malig-on ag eowas nga imprastraktura.
Ginpunto nana nga inde dapat iseparar ro pagpaumwad it imprastraktura sa pag-amlig sa kalikasan ag kaeowasan it publiko.
Ginsuhestyon man it opisyal ro paggamit it rainwater-harvesting systems agud mabuhinan ro pagbaha ag maiduso ro sustenableng paggamit it tubi.
Sa pakikipagpueong sa mga pinuno it rehiyon, gintalakay man nana ro progreso it National Task Force to End Local Communist Armed Conflict (NTF-ELCAC), ag gin-insister nga dapat pabaskugon ro mga programang sosyo-ekonomiko kaparehas it ayuda, emergency employment, farm-to-market roads, land patents ag pagpatindog it eskwelahan agud masolusyunan ro ugat it kinagamo.
Ginpunto pa ni Lotilla nga dapat magbuligan ro pag-amlig sa kalikasan ag seguridad sa idaeom it whole-of-government approach agud masiguro ro malig-on ag eowas nga paaeabuton it Western Visayas.
