KALIBO, Aklan—Gindesisyunan it Boracay Inter-Agency Task Force nga kanselahon anay ro tanan nga mga events nga nakalinyada para sa LoveBoracay nga dating LaBoracay.
Suno kay Malay mayor Frolibar Bautista nga ginkasugtanan sa meeting nga ginpatigayon ko Huwebes kaibahan si Department of Environment and Natural Resources ukon DENR Undersecretary Benny Antiporda nga indi anay pagpadayunon ro event bangud sa paeag it coronavirus disease ukon covid-19.
Kasunod man raya sa ginpaguwa nga Executive Order No. 18 ni Aklan Governor Florencio Miraflores nga kanselahon anay ro mga mabahuean nga pagtililipon sa mga pampublikong lugar.
Ro LoveBoracay nga naka scheduled kunta sa Abril 26 hasta Mayo 2, kun sa siin, hay kasado eon ro mga events kapareho it skim Boarding Contest, Pinta Layag, Local Kite Boarding ag Wind Surfing Tournament Drone Film Festival, Water Festival, National Life Guards Olympics, Beach Futzal ag Volleyball, Aklan Hammock Festival, Sabor Boracay, Stand Up Paddle Boat Racing, Larong Lahi, Frisbee, Boracay Clean Up ag Toy Boat Racing.
Nasayuran nga raya eon kunta ro ikaywang dag-on nga pagpatigayon it Love Boracay.
Ginpahayag ni Mayor Bautista nga masubo man kunta ro mga nagakatabu makaron sa isla , apang mas kinahangean ro pagdahan agud nga malikawan ro pagkalhit it makamaeatay nga virus.
Tuyo kunta it love boracay nga mapabaskog ro domestic tourism kasunod it pagbagsak it international tourist arrival eabi eon it Chinese ag Koreans.
