KALIBO, Aklan–Ginpaathag it Land Transportation Franchising and Regulatory Board (LTFRB)-6 nga owa pa sanda it nabaton nga petisyon halin sa mga Public Utility Jeepney angot sa pagpasaka it pamasahe matapos ro sunod-sunod nga oil price hike.
Buot hambaeon kara, nagapabilin ro presenteng panueoktan sa pamasahe it mga naga-biyaheng public transportation sa rehiyon.
Sa pihak kara, ginpahayag ni Atty. Jun Altura, tagapaghambae it LTFRB-6 nga ginaeauman eon nanda ro pagpasaka it petisyon it mga PUV drivers sa mga masunod nga adlaw engkaso nga indi gihapon magpundo ro pagsipa it presyo it petrolyo.
Nasayuran nga maabu pang driver/operator ro owa nakabaton it fuel subsidy halin sa gobyerno partikular sa probinsya it Iloilo samtang sa probinsya it Aklan 16 eon lang ro owa nakabaton halin sa kabilugan nga 470 nga benepisyaryo.
Ginpahayag dugang nga nagahueat pa sanda it impormasyon sa ginatao nga ayuda sa iba pang sector it transportasyon kung siin nagdugang ro ahensya it kapin sa P2.5 billion nga pondo.
Sa makaron hay owa pa sigon sanda it ideya kung hin-uno raya iga-download ag kun pila ro alokasyon kara sa kada probinsya.
Samtang, ginpasiguro man ni Atty. Altura nga igapaabot nanda sa central office ro concern it transportation sector sa pilang ka mga probinsya sa Western Visayas.
Partikular nga gintumod kara ro posibleng pagtukod it satellite office ukon mobile sa kada probinsya agud nga mapadali ro pagproseso it mga driver/operator kung siin indi eon nanda kinahang-ean pa nga mag-adto sa siyudad it Iloilo sa paglakad it andang pagpeles.
