KALIBO, Aklan–Ginpaathag ni Edgar Igcazensa, manager it Malinao-Lezo Transport Cooperative nga ro LTFRB Memorandum Circular No. 2023-013 hay para sa mga individual franchise holder nga owa pa nakapa-miyembro sa andang kooperatiba ukon korporasyon sa natungdan nga rota.
Raya hay may kaangtanan sa anunsyo it Land Transportation Franchising and Regulatory Board ukon LTFRB nga maga-extend sanda it prangkisa ukon Provisional Authority para sa mga tradisyunal nga jeep.
Suno kay Igcazensa nga tuyo kara nga mataw-an it bastante nga tiempo ro mga franchise holder nga makasunod sa modernization program it gobyerno.
Dugang pa kara nga haeos tanan nga mga transport group sa kada banwa sa aklan hay consolidated eon sa andang natungdan nga kooperatiba, apang may pila gihapon nga mga jeepney owner nga owa naila nga magpasakop bangud sa owa pagpabor sa programa it gobyerno.
Gintaw-an it LTFRB ro mga traditional jeepney operator ag driver it hasta sa June 30, 2023 para maka-sueod sa mga kooperatiba.
Dapat accredited it Office of the Transport Cooperative ro mga kooperatiba ukon rehistrado sa idaeum it Securities and Exchange Commission hasta sa August 31, 2023.
Sa pihak nga parte, ginpahayag ni Igcasenza nga ro ginahueat eon lang nanda makaron hay ro pagbilog it provincial government it local public transport route plan ukon LPTRP agud nga makabakae it modernized jeepneys.
Samtang nga owa pa sigon it LPTRP magabilin nga ro andang tradisyunal jeepneys ro magabiyahe.
