Kalibo Aklan ———-Balik-operasyon eon ro Land Transportation Office (LTO-Aklan) matapos ro ginpatigayon nga daywang adlaw nga disinfection.
Suno kay Engr. Marlon Velez, hepe it LTO-Aklan nga napilitan sanda nga magsarado ko nagtaliwan nga mga inadlaw matapos nga pila sa andang mga empleyado hay tinamaan it COVID- 19.
Sa pihak kara, limitado sa gihapon ro andang pagbaton it mga kliyente kada adlaw ag nagapatuman it “no appointment, no transaction” policy agud nga malikawan ro pagginutok it mga tawo .
Sa pihak nga parte, bangud sa limitado nga pagbaton it mga transaction it andang taeatapan, ro mga nag-expire nga lisensiya ag rehistro ko buean it Hunyo ag Hulyo hay gin-extend hasta Agosto ag Setyembre .
Mag-eowas kara, ro tanan nga mga rehistro, lisensiya ag student permit nga maga-expire makaron nga Agosto hay makaangkon it sang buean nga extension ukon hasta sa Setyembre 31.
Samtang, ro mga maga-expire nga rehistro nga may ending nga 8 ag 9 sa Setyembre kaibahan ro mga lisensiya ag student permit hay ginpaeawig ro anang validity hasta sa Nobyembre 30, 2021.
Raya hay nagakahueugan suno kana nga owa it penalty ag apprehension .
Gindugang pa ni Engr. Velez nga ginatutukan man nanda makaron ro mga long overdue nga mga rehistro ag lisensiya nga dapat gid nga ma-renew .
Bangud nga pandemic, nagatanyag sanda it libre nga 15-hours nga theoretical driving course sa mga gustong magbo-oe it student permit.
Sanda eamang sigon ro may makarondaya nga gina-offer nga programa sa tanan nga mga LTO offices sa guwa it Iloilo.
Mabahoe sigon raya nga bulig bangud nga haeos 2,000 pesos ro pagagastuson kara sa mga private nga driving school.
