KALIBO, Aklan—Umpisa ko nagtaliwan nga domingo hay gin-umpisahan eon it Land Transportation Office ukon LTO-Aklan ro pag-isyu it plastic cards para sa mga naga-renew it andang driver’s license.
Raya ro ginpahayag ni Engr. Marlon Velez, hepe it LTO-Aklan.
Apang ro backlog sa mga lisensiya ukon ro mga naisyuhan it temporary license nga naka-imprenta sa papel umpisa ko Abril hasta Setyembre, 2023 hay owa pa it kasiguraduhan kon hin-uno mataw-an it plastic cards.
Raya hay bangud nga limitado pa ro supply nga ginpadaea kanda.
Posible suno kana nga sa katapusan it makaron nga buean it Oktubre hay maga-abot eon ro supply nga mga license cards agud maumpisahan ro pag-imprinta ag ma-scheduile ro pag-release kara sa buean it nobyembre.
Samtang, gindugang pa ni Engr. Velez nga maskin nga gintaw-an it extension para sa renewal, apang naobserbahan sigon nanda nga kaabuan sa mga naga-agto sa andang opisina hay naga- renew sandig sa andang schedule.
Nasayuran nga ginpaeawig it ahensiya ro gahum it driver’s license it an-um nga buean nga nag-expire umpisa ko Abril 24 it makaron nga dag-on ukon hasta Oktubre 31.
Matapos nga makaangkon it kakueangan sa plastic driver’s license cards nagdesisyon ro ahensiya nga mag isyu it temporary licenses nga naka imprinta sa papel.