KALIBO, Aklan—Ginpamalibaran it Land Transportation Office ukon LTO-Aklan ro napabalitang pag-obliga sa mga naga-apply nga magbo-oe it drivers license nga mag-tree planting ukon magtanum it puno it kahoy.
Raya ro ginpahayag ni LTO-Aklan head Engr. Marlon Velez.
Suno kana nga ro mga requirements sa pagbo-oe it lisensiya hay nakabaehag sa citizens charter nga aprubado it civil service commission.
Kinahangean sigon nga magbo-oe anay it student permit antes nga makaangkon it non-professional ag professional drivers license.
Ro ginabaton sigon makaron it LTO sa pagbo-oe it lisensiya hay ro live birth certificate ag medical certificate online nga igapasa it mga accredited clinics ag mga doktor.
Kaibahan kara ro magabo-oe it student permit ag mga maga-renew it andang lisensya.
Nadugang sigon sa requirements ro theoretical driving course nga ginapatigayon it mga accredited na driving school nga kon sa siin sa Aklan, tatlo ro andang gin-aprubahan.
Raya sigon ro may kinamatarung nga mag isyu it certificate of completion nga gina-upload sa LTO IT system.
Gindugang pa ni Engr. Velez nga pagkataliwan it sang buean hay pwede eon nga mapa-convert sa non-professional ro student permit ag pagkatapos it an-um nga buean hay sarang eon nga makabo-oe it professional drivers license.
Apang nagakinahangean pa raya it written ag practical driving examination nga puro online.
Kapin sa 3,000 pesos ro penalidad sa madakpan nga naga-maneho daea ro invalid drivers license.
Mag-eowas kara, may posibilidad pa nga masuspinde it sang dag-on ro anang pagmaneho.
Tuyo sigon kara nga makaangkon it quality ag defensive drivers.
