KALIBO, Aklan—Maga-aksyon ro Land Transportation Office ukon LTO sa oras nga ma-revise eon ro traffic ordinances.
Raya ro ginpahayag ni Engr. Marlon Velez, head it LTO-Aklan kasunod it mandu it Department of Interior and Local Government ukon DILG nga nagabawae sa mga tricycle nga magbiyahe sa mga national highways.
Suno kay Engr. Velez nga ro revised traffic ordinances ro andang pagabasehan sa pagdakop sa mga maga-eabag kara.
Sa makaron sigon hay owa pa it ordinansa nga nagabawae kanda nga mag-agi sa mga national highway bangud sa gintau nga mga prangkisa sa mga pampasaherong tricycle.
Base suno kana sa memorandum it DILG, ginamanduan kara ro mga LGU’s nga i-review ag bag-uhon ro andang mga naga-eksister nga ordinansa sa trapiko.
Samtang, gindugang pa ni Engr. Velez nga ro andang ginatutukan makaron kaibahan ro Highway Patrol Group ag Aklan Police Provincial Office hay ro mga tricycle, motorsiklo, pedicabs ag iba pa nga nagapatunga sa mga national highway ag owa naga-agi sa gintaeana kanda nga slow moving vehicle.
Ginpaathag pa ni Velez nga sandig sa laye, indi pwedeng mag-agi ro mga tricycle sa national highway nga may naga-agi nga four-wheel vehicles ag may bug-at nga masobra sa ap-at nga tonelada ag ro normal speed limit hay naga-eampas sa 40 kph bangud nga masyado raya nga peligroso.
