Kalibo Aklan ——Magalibot sa mga terminals ag magabantay sa mga daeanon ro mga miyembro it Land Transportation Office ukon LTO sandig sa guidelines nga ginpaguwa it Department of Transportation (DOTr).
Suno kay LTO-Aklan head Engr. Marlon Velez, raya hay may kaangtanan gihapon sa Extended General Community Quarantine nga ginapatuman sa bilog nga probinsya it Aklan tuga it coronavirus disease (COVID-19)pandemic.
Ginpahayag nga kinahang-ean gihapon nga i-obserba ro social distancing sa tanan nga pribado ag pampublikong behikulo kon sa siin required eamang ro 50 percent passenger capacity sa tanan nga klase it saeakyan.
Engkaso suno kana nga may madakpan sanda nga magaeabag kara hay insigida nanda raya nga pagatikitan ag pamultahon.
Samtang, nag-abiso eon sigon ro Ceres liners ag Southwest tours nga magabalik ro andang byahe nga may ruta Kalibo to Altavas vice versa ag Kalibo to Caticlan vice versa anuman oras umpisa makaron nga adlaw it Lunes.
Samtang sa pihak nga parte, ginklaro ni Engr. Velez nga uwa it gin-anunsyo ro Land Transportation Franchising and Regulatory Board ukon LTFRB nga magpataas it pamasahe ro mga pampublikong saeakyan.
Raya hay kasunod sa pila ka mga reklamo it commuters nga doble ro ginasukot kanda nga pamasahe bangud sa paglimita man it mga pasahero.
Ginpahayag ni Engr. Velez nga inde pwede magpataas it pamasahero ro mga asosasyon it maskin anong klase nga saeakyan mag-eowas eon lang kon ro mismong pasahero ro nagata-o it konsiderasyon sa driver nga pasobrahan ro anang ginata-o nga pamasahe.
Gin-engganyo ni Engr. Velez ro commuters nga magdangop sa andang taeatapan ag magdihon it pormal nga reklamo kaangot sa mga drivers nga mapamentaha sa tyempo it pandemic crisis.
