KALIBO, Aklan — Mas pang ginpabaskog it Land Transportation Office (LTO Aklan) ro andang kampanya kontra sa colorum ag bukon it rehistradong nagapasada nga tricycles eabi eon sa banwa it Kalibo.
Suno kay Engr. Marlon Velez, hepe it LTO-Aklan nga kaibahan ro Highway Patrol Group, Kalibo Municipal Police Station ag Kalibo Auxiliary Police hay nagapatigayon it mga operasyon agud nga matapna ro mga colorum nga tricycle ag iba pang mga bayolasyon it mga drivers.
Ginpahayag dugang nga importante nga ro nagabiyahe nga tricycle hay naka-rehistro ukon may prangkisa bukon eamang para sa kaeowasan it mga driver kundi sa mga pasahero kara.
Owa sigon imaw it ginabuytan nga numero it mga nadakpan nga colorum tricycles bangud nga gina-endorso nanda raya sa munisipyo.
Kan-o eamang hay nakipag-angot sanda sa mga opisyal nga nagabuyot it Committee on Transportation ag presidente it nagkaeain-eain nga Tricycle Operators and Drivers Association (TODA) angot sa nasambit nga isyu.
Suno kana nga mismong mga lehitimong tricycle drivers hay nagareklamo sa naga-inabu nga numero it mga colorum nga mga tricycles bangud nga gina-agaw sigon ro kita nga dapat hay para kanda.
Sa pihak nga parte, ginpahayag pa ni Engr. Velez nga hasta sa makaron hay owa pa naka-isyu it night franchise ro LGU-Kalibo agud nga legal nga makabiyahe ro mga colorum nga kaeabanan nga naga-operate kon gabi-i.
