Uman nga nagpadumdom ro Land Transportation Office ukon LTO Aklan sa mga motorista nga likawan nga mag-install it mga blinker ag wang-wang sa andang mga pribadong behikulo.
Ginpahayag ni Engr. Marlon Velez, head it LTO Aklan nga allowed eamang nga maggamit kara ro mga law enforcement agency sa mga service vehicle kaparehas it patrol car it philippine national police, armed forces of the philippines, provincial drugs enforcement agency ukon PDEA ag iba pa nga ginagamit sa pag-eagas it mga kriminal.
Otorisado man nga gumamit ro mga emergency responders kaparehas sa rescue vehicles ag ambulansya agud nga masayuran it mga motorista nga kinahang-ean sanda nga paunahon bangud nga emerhensiya ro andang pamanaw.
Mag-eowas sa mga nasambit nga otorisadong ahensya it gobyerno hay uwa eon it iba pang makagamit it blinker ag wang-wang bangud nga hugot raya nga ginabawae it gobyerno.
Sa oras nga madakpan ro sin-o man nga mag-eabag sa nasambit nga sueondanan hay may pagaatubangon nga penalidad sa laye.
