KALIBO, Aklan — Nagpadumdum ro Land Transportation Office (LTO Aklan) sa mga motorista nga sundon ro tamang paggamit it fast ag slow lane agud nga malikawan ro mga aksidente ag mabawasan ro pag-gutok it daeagan it trapiko.
Suno kay Engr. Marlon Velez, hepe it LTO-Aklan, kinahangean nga magpabilin ro mga traysikel ag iba pang slow moving vehicle sa outer ukon slow lane, eabi eon sa mga national highway .
Pwede sigon sanda nga sitahon sa paggamit it fast lane.
Dugang pa ni Velez nga pwede man nga magpatuman ro mga lokal nga gobyerno it ordinansa angot sa speed limit.
Padayun man sigon nga ginasueong it ahensya ro tamang paggamit it karsada pinaagi sa driver’s education ag Comprehensive Driver’s Education Program.
Aminado man si Velez nga limitado ro numero it andang mga tawuhan agud nga magbantay sa mga nagapangunang karsada 24/7 bangud sa iba pang obligasyon it ahensya.
Bangud kara, nagpanawagan ro LTO it pakikipagbueuligan halin sa mga lokal nga gobyerno, kapulisan, ag publiko agud nga mas pang mapabaskog ro pagpatuman it mga batas-trapiko ag mapabilin ro disiplina sa karsada.
Nauna kara, nagapanawagan ro sangka balikbayan sa LTO-Aklan nga mas pang pabaskugon ro pagpatuman it batas trapiko kontra sa mga tricycle ag motorsiklo nga gina alegar nga nagapang-agaw it linya sa mga national highway.
