KALIBO, Aklan—Ginpasiguro it pamunuan it Land Transportation Office (LTO)-Aklan nga padayun ro andang pagsikyar sa mga pampublikong transportasyon para masiguro nga ginasunod it mga raya ro minimum health protocols.
Raya hay sa tunga it uman nga paglobo it mga nailistang kaso it COVID-19 sa nasyon.
Suno kay Engr. Marlon Velez, Head it LTO-Aklan, padayun nga ginapatuman ro 70 porsyento nga seating capacity sa mga pampublikong saeakyan apisar nga nakaangkon it pagtaas sa kaso it COVID-19 infection.
Hugut sigon nanda nga ginabantayan kaibahan ro Philippine National Police (PNP) ro mga driver nga naga-overloading eabi eon kung rush hour.
Sa makaron, nagahueat pa sanda it igapaguwa nga guidelines halin sa National IATF angot sa igapatuman nga bag-ong sueondanan.
