KALIBO, Aklan—Paga-umpishan eon sa Nobyembre 7 sa probinsiya it Aklan ro 10-year validity it mga gina-renew nga driver’s license.
Suno kay Land Transportation Office ukon LTO-Aklan head Engr. Marlon Velez nga ro tanan nga mga drivers nga owa it anuman nga traffic violation records hay pwede eon nga makapag-renew it andang lisensiya nga may una nga expiry it hasta napueong dag-on.
Mag-eowas sa mga first timer nga nagabuyot it mga student permit.
Ro mga may violations hay pagataw-an it validity nga tatlo hasta limang dag-on.
Ginpaathag ni Engr. Velez nga ginapatuman nanda makaron ro demerit system bilang kaparte it implementing rules and regulations it RA 10930 nga ginpirmahan ni pangueong Rodrigo Duterte ko 2017 nga nagapaeawig sa validity it mga drivers license.
Ginpahayag dugang nga ro mga motorista nga maga-renew it andang lisensiya hay kinahangean nga makapasar anay sa comprehensive driver’s education ukon CDE program antes nga magsumite it andang application
Pwede raya nga mabo-oe pinaagi sa mga authorized nga driving schools ukon online.
Magaserbi sigon raya nga insentibo sa mga motorista nga bukon it kaskasero ukon hugut nga nagasunod sa traffic rules and regulation.
Samtang, ro bayad sa pagpa-renew makaron it lisensiya para sa 10-year validity hay naga-abot sa 580 pesos.
Kadungan kara, gin anunsyo man ni Engr. Velez nga ginpaeawig pa it LTO it hasta sa Disyembre ro validity it tanan nga mga student permits, driver’s license ag conductors license nga nakataeanang ma-expire makaron nga Oktubre 31 bilang konsiderasyon sa ginapatuman nga quarantine restrictions sa nasyon.
