KALIBO, Aklan—Matapos nga mapadaea it Kalibo Police Station ro mga police report ag reklamo hay paga-umpisahan it Land Transportation Office ukon LTO Aklan ro imbestigasyon sa natabu nga pagsaeawig it owa nakilaea nga driver it itom nga SUV sa sangka katapo it Kalibo Auxiliary Police sa kahabaon it Roxas Avenue, Kalibo.
Raya ro ginpasiguro ni LTO Aklan head Engr. Marlon Velez.
Suno kana nga partikular nanda nga pagasayuron kon sin-o ro nagapanag-iya it nasambit nga saeakyan ag kon sin-o ro nagamaneho kat matabu ro insidente.
Pormal man sigon nanda raya nga pagakasuhan bangud sa reckless driving ag disregarding traffic officer.
Gindugang pa ni Engr. Velez nga pwede raya nga maging daean agud nga masuspinde ukon eubusan nga mabawi ro anang drivers license.
Sa oras nga matumod ro driver hay posibleng padaehan nanda raya it show cause order para sa imbestigasyon.
Igapa-agi sigon nanda sa due process ro pagpapanaog it penalidad.
Mabahoe nga bulig sigon sa andang imbestigasyon ro bo-oe it CCTV nga kun sa siin hay nakita ro anang plate number.
