NATIONAL News — Nakataeana nga magpaidaeum ro mga tawuhan it Land Transportation Office (LTO) sa bilog nga nasyon sa mandatory retraining, kasunod it pagkalhit it sangka video kun sa siin naboe-an ro pagiging bayolente it enforcers sa pagdakop sa sangka motorista sa Panglao, Bohol.
Suno kay LTO chief Atty. Vigor Mendoza II, sakop it retraining sa pakikipagbueuligan sa Philippine National Police (PNP) ro update it protocols, agud nga masiguro nga indi eon mauman ro makarondaya nga insidente.
Kasunod raya it pagkalhit it video online, kun sa siin makitang buyot it enforcers ro sangka eaeaking naka-eubog sa ibabaw it motorsiklo ag dayun nga ginbira paubos.
Mabatian man nga ginasinggitan nana nga imaw hay sangka mangunguma rason nga may daea nga bolo.
Gindakop ro eaeaki nga ko ulihi hay nakilaea nga magueang it dating vice mayor it Panglao, Bohol, ag ginkulong sa custodial facility it Panglao Police Station.
Indi pa matumod ro rason it pagdakop kana.
Sa makaron hay owa pa it pahayag ro regional director it LTO angot kara.
Nagpaguwa man it pahayag ro LTO Region 7 kun sa siin nagpangayo raya it pasaylo sa insidente, ag ginpamilit nga raya hay natabu sa interes it kaeowasan ag public law ag order.
