Ginklaru it Land Transportation Office (LTO) nga owa it total ban sa e-bikes ag e-trikes ag pwede sa gihapon nga magbiyahe sa mga city ag municipal roads.
Suno kay LTO chief Markus Lacanilao, ro ginabawae eamang hay ro pag-agi it mga raya sa national highways ag nagapangunang karsadahon ag iba pang major thoroughfares.
Ginpahayag it LTO nga ginapatuman ro restriksyon bangud sa road safety concerns, eabi eon sa magkaiba nga kadasigon it e-bikes ag e-trikes kumpara sa ibang saeakyan nga pwedeng magtuga it aksidente.
Ginpamilit it ahensya nga raya hay preventive measure ag bukon it penalidad.
Sa Metro Manila, ginapatuman ro nasambit nga polisiya kabulig ro MMDA, samtang sa mga probinsiya hay paga-unahon anay ro information campaign samtang gina-ayos pa it Transportation Department ro pinal nga guidelines.
