KALIBO, Aklan—Magapatindog it panibag-ong opisina ro Land Transportation Office ukon LTO sa banwa it Ibajay.
Suno kay Aklan 2nd district board member Jay Tejada, ro nasambit nga proposisyon hay bentaha para sa mga pumueoyo eabi eon sa mga kaeapit nga banwa.
Apisar nga may satellite office ro LTO sa banwa it Malay, mas makapamayad sigon nga magtukod it uman para sa ikaywang distrito it probinsya.
Ginpaathag ni Tejada nga sambilog sa mga rason kara hay ro pagdagsa adlaw-adlaw it mga kliyente sa taeatapan it LTO sa banwa it Kalibo ag Malay kon siin ro iba hay kinahang-ean pa nga umabsent sa andang trabaho para eamang matapos ro andang transaksyon.
Mag-eowas kara, makakriar pa raya it trabaho sa mga aklanon ag ro mga maintok nga negosyo nga may kaangtanan sa operasyon it LTO ag mga motorista hay maga-umwad man bangud nga mapaeapit eon kanda ro sambilog sa mga masako nga opisina kada adlaw.
Dugang pa ni Tejada nga ro pondo sa pagpatindog sa nasambit nga taeatapan hay magahalin sa gobyerno nasyonal ag uwa it igapaguwa kara nga kantidad ro Aklan provincial government.
