KALIBO, Aklan–Ginkumpirma it Land Transportation Office (LTO)-Kalibo nga pwede eon nga magproseso online ro mga nagapanag-iya it pribadong saeakyan pinaagi sa andang ginlusar nga Land Transportation Management System ukon LTMS Portal.
Suno kay Engr. Marlon Velez, Chief it LTO-Kalibo nga dikara nanda pwedeng iproseso ro renewal it rehistro it andang private vehicle.
Ro pag-renew hay nagakinahangean it Certificate of Cover ukon COC maghalin sa napili nga insurance company ag para sa saeakyan nga paga-inspeksiyonon it anumang Private Motor Vehicle Inspection Center (PMVIC).
Makabig eon man nga cashless ro transaksyon bangud pwede nga magbayad pinaagi sa Gcash samtang gina-workout eon man ro pagpatigayun it bank transfer.
Matapos sigon nga magbayad hay paga-isyuhan sanda it resibo via email kung siin kinahang-ean eamang nga ipakita sa pinakamaeapit nga LTO office ro transaction number para sa pag-imprinta it official receipt.
Sa raya sigon nga pamaagi hay malikawan ro pag-abo it mga tawo ag mapunggan ro paggamit it mga fixer sa district offices it taeatapan.
Ro nasambit nga inisyatibo hay sa pagtinguha it ahensya nga i-digitize ro mga operasyon kara.
Ro renewal rates hay magapabiling pareho ukon P240 para sa mga motorsiklo, P300 para sa mga motorsiklo nga may sidecars, P1,600 hasta P8,000 para sa mga kotse depende sa kabilugan nga kilo ag klase it kotse.
Ro online renewal hay para eamang sa mga saeakyan nga nakarehistro sa portal.
