KALIBO, Aklan–Mas pang ginpaeawig it Land Transportation Office (LTO)-Kalibo ro andang serbisyo para sa mga motorista nga gustong magbuoe ukon magrenew it driver’s license.
Raya hay matapos nga ipatuman ro full capacity sa andang taeatapan kasunod it paghaeuga it alert status sa probinsya it Aklan.
Ginpahayag ni Engr. Marlon Velez, Head it LTO-Kalibo nga sarang eon nanda nga maakomodar ro 40 hasta 60 nga mga indibidwal nga nagapatigayun it license renewal, nagabuoe it student permit ag exam kada adlaw.
Angot kara, may mga dugang nga requirement sigon sanda nga ginpagguwa para sa mga gustong magbuoe it lisensya kung siin nakabaehag sa Republic Act 10930 ukon pagpaeawig it hasta napueong dag-on it validity it lisensya ro pag-angkon it Comprehensive Driver’s Education (CDE) Certificate it mga naga-renew.
Pwede sigon nga mag-enroll sa private driving school ukon magbuoe it online exam sa LTO website.
Sa oras sigon nga makapasar kara hay gina-send nanda ro resulta via email.
Samtang, sa pagbuoe man it student permit ginakinahang-ean gihapon ro birth certificate halin sa Philippine Statistics Authority (PSA), valid ID ag dapat makompleto ro 15 oras nga theoretical driving course sa sangka LTO accredited driving school.
