KALIBO, Aklan—Umpisa sa masunod nga dag-on hay magatau ro Land Transportation Office ukon LTO it exclusive premium license cards sa sin-u man nga driver nga owa it traffic violations sa sueod it limang dag-on.
Ginpaathag ni Engr. Marlon Velez, operations head it LTO-Region 6 nga ro validity it premium license cards hay magabuhay it napueong dag-on ro validity.
Sakop kara ro sin-u mang professional ukon non-professional drivers’ license holder nga owa it naeabag nga laye sa trapiko sa idaeum it Republic Act No. 4136.
Magapatuman sigon ro LTO it bag-ong point system , kun sa siin ro drivers hay makabo-oe it demerit points sa kada pag-eabag sa laye sa trapiko ag makabo-oe man it incentives ro mga drivers nga owa nadakpan ukon pag-eabag sa batas trapiko.
Tuyo it point system sa mga motorista nga matumod ag ma-monitor ro mga drivers nga maabu nga violations.
Sa idaeum it point system, ro motorista hay makabo-oe it ‘demerit points’ depende sa bug-at it pageabag sa batas trapiko.
Raya hay igabase depende sa categories kapareho it grave – five points; less grave – three points; ag light -one point.
Apang ginklaru it LTO nga kun less ukon light violations man ro nahimo it motorista apang pauman-uman eon lang hay mahueog man raya sa grave violations.
Gindugang pa ni Engr. Velez nga sa idaeum it patakaran, ro driver’s license it sangka pasaway nga motorista hay posibleng masuspinde ag makabo-oe it 10 demerit points ag kon nakabo-oe it 40 points hay magaresulta sa revocation it lisensiya.
Samtang ro mga nagasunod hay makaangkon it kahigayunan umpisa sa Oktubre it masunod nga dag-on nga mataw-an it 10-years validity sa lisensiya bilang insentibo.
Sa raya nga pamaagi suno kana hay masaea ro mga responsableng driver, samtang pagaduea-on ro mga pasaway agud nga malikawan ro maabu nga mga aksidente sa karsadahon.
