KALIBO, Aklan–Naga-abot sa 30 ka mga driver ro ginpaidaeom sa random drug test it mga katapo it Land Transportation Franchising and Regulatory Board (LTFRB) Land Transportation Office (LTO) ag Philippine Drug Enforcement Agency (PDEA) sa Brgy. Tigayon, Kalibo kung siin tatlo ro nagpositibo sa paggamit it iligal nga droga.
Ro mga raya hay tumandok it Iloilo ag Negros kung siin nakataeana kunta sanda nga magbiyahe paadto it Cavite.
Suno kay Engr. Marlon Velez, Chief it LTO-Aklan nga insigida nanda nga gindaea ro tatlong ka mga driver sa Kalibo Municipal Police Station para sa proper documentation.
Samtang, nakataeana man nga ipaidaeum it uman sa drug test ro tatlo para sa pagkumpirma kung sanda hay matuod nga nagagamit it droga.
Engkaso nga magpositibo, ro tatlo hay magapangatubang sa pag-eabag sa Sec. 15 it Republic Act 9165.
Ginpaathag man ni Engr. Velez nga ro mga driver eamang ro andang ginapaidaeom sa random drug testing ag bukon it kaibahan ro mga sakay nga pahinante.
Nasayuran nga tuyo it pagpatigayon it random drug testing nga masiguro nga malimyo sa ginabawae nga droga ro mga nagamaneho it mga pampublikong saeakyan eabi eon ro mga nagabiyahe it maeayu-an.
