KALIBO, Aklan—Nagpadumdum ro Land Transportation Office ukon LTO Region 6 sa mga driver it pampasaherong tricycle ag utility jeepney nga magtau it 20 porsyentong discount sa mga estudyante.
Suno kay Atty. Gaudioso Geduspan, Assistant Regional Director it LTO-region 6 nga basta may student ID, dapat hay may discount.
Mabahoe nga bulig suno kana sa mga estudyante ro nabobo-oe nga discount sa pagsakay sa mga pampublikong saeakyan eabi eon makaron nga nagakalisod ro tanan bangud sa naexperiensiyahan nga pandemya.
Pwedeng i-reklamo ro mga tricycle ag PUJ drivers nga owa nagatau it discount sa mga estudyante sa natungdan nga local government units ukon sa LTO-Aklan.
Ro fare matrix sigon hay nakabase sa ordinansa rason nga ro sin-o man nga maga-eabag kara hay posibleng maboe-an it prangkisa.
Base sa ginpaguwa nga memorandum it LTFRB, may nagakaigo man nga multa ro sin-o man nga operator ag driver it PUJ nga maga-eabag.
Mag-eowas kara, may posibilidad pang ma-impound ro saeakyan ukon makansela ro prangkisa sa ikatlong opensa.
Ginklaru dugang nga ro student discount hay ginapatuman maskin nga weekend, holiday, summer ukon semestral break.
Apang bukon it kaibahan ro mga graduate student, ukon mga estudyanteng naga-eskwela it medisina, abugasya, ag graduate studies.
