KALIBO, Aklan—Uman nga ginasueong it regional ag provincial police office ro pagpatigayon eon man it license to own and possess firearm ukon LTOPF caravan sa probinsiya it Aklan.
Suno kay P/Staff Sgt. Jane Vega, tagapaghambae it Aklan Police Provincial Office ukon APPO nga madinaeag-on nga nataw-an it katumanan ro daywang adlaw nga kaparehong aktibidad rason nga uman nga nagahinyu si OIC provincial director P/Col. Victorino Romanillos nga madugangan ro slot.
Nasayuran nga sa ginpatigayon nga LTOPF caravan it APPO hay 400 eamang ro andang gintaeana nga slot kun sa siin raya hay ginkueang.
Tuyo sigon it aktibidad nga matapna ro mga loose firearms sa probinsiya kamana man nga bilang preparasyon sa nagahilapit nga barangay and sangguniang kabataan elections sa Oktubre.
Mabahoe nga bulig man ro pagtukod it one-stop shop sa pag-facilitate sa madasig nga pagtau it serbisyo sa mga kliyente kun sa siin pila sa mga naka avail kara hay sanda nga mga kapulisan mismo.
Pinaagi sigon sa LTOPF caravan, ro mga nagapanag-iya it baril hay makaangkon it legal nga dokumento ag indi mabutang sa aeang-aeang nga sitwasyon.
Sa pihak nga parte, mas ginhugtan pa sigon ro andang kampanya kontra sa loose firearms pinaagi sa inisyatibo nga “armas islan bugas”.
Padayun man ro andang house to house campaign agud nga mabantayan ro pagkalhit it mga bukon it lisensiyadong baril nga posible magamit sa krimen eabi eon sa nagahilapit nga eleksyon.
