BALITA Espesyal– Sangka art and fashion brand sa New York ro gina istoryahan makaron matapos nanda nga ilunsar sa publiko ro pinakabag-o nanda nga obra maestra, sangka handbag nga sa sobrang isot, nagakinahangean it microscope para makita raya it mayad.
Ko Hunyo 7, ginpakita it MSCHF sa andang Instagram ro bag nga gintawag nanda nga “Microscopic Handbag” nga may sukat nga 657 x 222 x 700 micrometers.
Sa sobrang isot kara, masarangan nana nga mag agi sa buho it dagum.
Sa maeayo, pagaeaumon mo nga raya hay sangka butil ukon binilog it asin nga kulay green.
Kon raya hay tan-awon sa idaeum it microscope, makita ro detalye kara nga inspired halin sa Louis Vuitton bag nga ‘OnTheGo’ tote bag.
Nabilog ro maisot nga bag pinaagi sa 3D printing.
Ro material it bag hay halin sa resin ag gin-obra raya pinaagi sa two-photon polymerization.
Suno sa chief creative officer it MSCHF nga si Kevin Wiesner, gin-obra nanda ro nasambit nga bag bilang komentaryo sa trend it mga designer luxury bags makaron nga nagasinaka eon ro presyo apang naga inisot ro size.
Nataeupangdan it pila sa mga creative staff it MSCHF nga ro mga nauusong maeahaeon nga bag sa merkado makaron hay matsa palamuti eon lang ag owa eon nagagamit sa matuod tuod kara nga purpose.
Pinaagi sa andang bag, gusto nanda nga ipa-realize sa mga tawo nga ro bag hay dapat ginabutangan it gamit ag bukon raya it dapat nga maging accessory eang.
Nag-umpisa ro auction it bag ko Lunes (Hunyo 19).
Makita raya nga naka-display sa 8 Avenue Matignon sa Paris umpisa Hunyo 20 hasta 24.
