KALIBO, Aklan–Maabu nga pasahero ro nagapabilin nga stranded umpisa ko adlaw it Lunes hasta it Martes partikular sa bahin it Mambusao, Da-o ag Dumarao, Capiz bangud sa pagpanaeasa it bagyong Agaton.
Ginpahayag ni Arnel Francisco, dispatser it Ceres Bus Terminal nga eagpas tawo eon ro tubi-baha sa nasambit nga mga lugar rason nga maabu nga mga bus ro indi makaeapos maghalin sa Iloilo paagto it Kaibo vice versa umpisa ko Lunes it gabi-i.
Suno pa kay Francisco apisar nga may mga alternatibo sanda nga rota paagto it Iloilo naging kontrolado ro andang pagpaguwa it mga unit bangud sa nasambit nga stranded kung siin paadto it Antique eang sigon ro andang kaeabanan nga naging ruta.
Ginaeauman nga magabalik eon sanda sa normal nga schedule it pagbiyahe makaron nga adlaw engkaso nga maghubas eon ro tubi-baha.
