KALIBO, Aklan—Ginareklamo makarun it pilang ka mga pomoeuyo sa Barangay Aliputos, Numancia ro pamilya Gruyon bangud sa gina-alegar nga mabaho ag nakakaperwisyo nga tangkae it andang baboy.
Suno sa tagreklamo nga si Ma. Gladys De Pedro Fajardo ag residente it nasambitan nga lugar nga makapilang beses eun nandang ginreklamo sa andang barangay ro mabaho nga babuyan it pamilya Gruyon apang hasta makarun hay owa raya nataw-an it nagakaigo nga aksiyon.
Suno pa kana nga owa imaw it personal nga kaakig sa nasambitan nga pamilya apang ro gusto eamang nana hay maangkon it maayos nga septic tank ro nasambit nga babuyan agud nga indi eun makaperwisyo sa ibang panimaeay.
Samtang, ginpapundo eun man sigon it barangay ro andang babuyan apang may una sa gihapon nga nabilin nga nayon ag urok.
Bangud kara hay nagakabaeaka sigon sanda para sa andang ikaayong eawas.
Sa pihak nga parte, ginklaro man ni Barangay Kagawad Nenita De Jesus it Brgy. Aliputos Numancia nga ginbisitahan eun it Rural Health Unit ukon RHU-Numancia kaibahan ro mga opisyalis it barangay ro babuyan it pamilya Gruyon matapos nga ireklamo it anang mga kaiping nga panimaeay.
Sa makarun hay nagpromisa eun sigon kanda ro pamilya Gruyon nga andang iga-dispose ro ibang mga baboy samtang naga-usoy pa it lugar nga masayluhan.
