KALIBO, Aklan– Makipagdayalogo makaron nga adlaw ro Alliance of Concerned Teachers ukon ACT Party List sa National Food Authority ukon NFA agud nga masayuran ro andang sabat kon ham-an it mabaho nga klaseng bugas ro gintao sa mga manugturo nga promisa it gobyerno bilang dugang nga ayuda kanda.
Suno kay ACT Party List Representative France Castro nga mag-eowas kara hay panawagan man it mga manugturo nga bayluhan it manami ag dekalidad nga klase it bugas nga pwede nanda nga matug-on bangud nga mabahoe raya nga bulig para kanda.
Madumduman nga ginpanupod it gobyerno ro 25 kilos nga rice allowance sa mga manugturo partikular sa rehiyon it Luzon ag Visayas apang nakaangkon raya it reklamo bangud nga mabaho ag inde mapuslan ro bugas nga andang nabaton.
Samtang, padayon nanda nga ginaduso ro pagpataas it sweldo it mga manugturo.
Target nanda ro salary grade 15 para sa entry level it mga pampublikong manugturo bangud nga deserve nanda raya nga panwelduhan sa andang serbisyo nga ginata-o.
