KALIBO, Aklan — Kipo ro bibig it pamunuan it Estacio Uno nga gina panag iyahan ni Marcelino M. Florete, Jr. may kaangtanan sa mga bayolasyon kara nga gina eakipan it setback maghalin sa karsada ag 25+5 meter easement rule maghalin sa shoreline sa isla it Boracay.
Natukiban it Bombo Radyo nga pila sa mga mabahoe nga establisimento sa isla nga na-validate nga illegal structures hay padayun nga naga pakamatig-a ag owa pa naga patigayun it self-demolition.
Paga hueaton eon lang sigon ro desisyon kara it gobyerno eabi eon it inter-agency task force.
Haum sigon sanda nga atubangon sa korte ro kasong iga pasaka kontra kanda.
Kan-o eamang hay uman nga nakipagpueong si Environment Secretary Roy Cimatu sa mga opisyal it Department of Public Works and Highways (DPWH) Region 6 agud estoryahan ro mga sabeag nga gina pangatubang sa road easement ag demolition.
Gina tugyan sigon it DENR sa LGU-Malay ang pagtibag sa mga iligal nga istraktura pinaagi sa pagbo-oe it court order engkasong indi magkusa ro mga violators nga magpatigayun it self-demolition.
Nagpahayag man it pagkadismaya si Cimatu sa mga establisimento nga owa naghimo it solusyon sa andang environmental violations.
Pila sa mga mabahoe nga establisimentong nakatukod sigon sa wetlands nga kinahangeang i-demolish ro Balabag Elementary School, Alta Vista de Boracay Hotel, Kingfisher Hotel, Crown Regency Hotel ag D’Mall.
Haeos an-um nga adlaw eon lang ro nabilin bago ro nakataeanang temporaryong pagpasara sa Boracay sa Abril 26 agud taw-an it daean ro paglimpiyo ag rehabilitasyon.
Gin tinguhaan man it Bombo Radyo nga maboe-an it pahayag ro nasambitang mga establisimento, apang, owa nagpasugot ro mga raya.
