KALIBO, Aklan — Napaseawan nga makasunod sa gintaeana nga tatlong adlaw nga palugit ro sangka mabahoe nga resort sa station 2 sa pag-dismantle sa 14 nga steel posts nga andang gin tukod sa vegetation line sa sueod it 25+5 meters setback ukon no build zone sa beachfront.
Gin abisuhan eon it lokal nga gobyerno it Malay ro naga panag iya it resort nga si Mr. Henry Chusuey, chairman it Boracay Foundation Inc. (BFI), grupo it mga stakeholders sa isla may kaangtanan sa anang violation, apang, owa nagtuman.
Nauna kara, nagpromisa ro mga stakeholders nga maga bulig sa paglimpiyo sa isla ag maibalik ro dating kanami kara.
Sa pihak nga parte, umalma ro pilang mga maisot nga vendors nga nagpatigayun it self-demolition kun ham-an owa nakadunghan kanda ro mga mabahoe nga violators.
Kasunod kara, umapela sanda nga mataw-an it lugar nga masayluhan agud indi mawad-an it pangabuhian.
